E-tol: Regering waarsku 'vandale'
2012-11-29 10:28
Johannesburg – Enigiemand wat eiendom by die beoogde betogings teen die e-tolstelsel beskadig, sal vervolg word, het die regering gewaarsku.
“Die regering doen ‘n beroep op betogers om hul reg om te betoog, uit te oefen, maar binne die beperkings van die wet,” het Thabo Masebe, ‘n woordvoerder, gesê.
Die waarskuwing kom nadat Dumisani Dakile, Cosatu se Gautengse sekretaris, gesê het die vakverbond gaan die e-tolstelsel se stellasies afbreek indien die regering nie na hulle luister nie.
Dakile het aan Eyewitness News gesê hy is verkeerd verstaan en het bedoel om te sê dat die regering wat die huise in Lenasia gesloop het, ook die tolpadhekke moet afbreek.
Phutas Tseki, Gautengse voorsitter van die vakverbond, het vroeër ‘n beroep op die publiek gedoen om op 30 November (Vrydag) aan die optog deel te neem.
Die sekretaris-generaal van die vakverbond, Zwelinzima Vavi, sê hierdie is net die begin.
“Op die sesde Desember gaan ons nie net ‘n optog hou nie, maar die regering ‘n voorsmakie gee van wat hulle in Maart kan verwag as hulle die wet van krag gaan maak en die implementering van die e-tolstelsel afdwing,” het hy gesê.
Regeringsamptenare sê die optog sal noukeurig gemonitor word.
Volg Nuus24 op Twitter
- SAPA
