E-tol: Betogers ry teen slakkepas
2012-12-06 10:16
Johannesburg – Motoriste wat aan die protesaksie teen die e-tolstelsel deelneem, beweeg na bewering teen 20 km/h in Braamfontein.
“Daar is geen rede om haastig te wees nie, kamerade; ons het al die tyd tot ons beskikking,” het Dumisani Dakile, Gauteng se sekretaris van Cosatu, gesê.
In Katlehong aan die Oos-Rand beweeg motoriste teen 10 km/h.
Voetgangers langs die hoofweë het vir die betogers gewaai en mede-motoriste het hul toeters in solidariteit geblaas.
Die polisie is voor en agter die motorstoete geposisioneer.
Voor die betoging begin het, het ‘n predikant, Paseka Motsoeneng, gesê daar sal chaos in die land wees indien die omstrede e-tolstelsel voortgaan. Hy sê die tolstelsel sal die bywoning in sy kerk ook raak.
Cosatu het verlede week gedreig om die provinsie se strate te beset en hoofweë te versper indien die vakverbond nie positiewe terugvoer op memorandums wat aan talle departemente oorhandig is, kry nie.
Volg Nuus24 op Twitter
- SAPA
