Dwelms smokkel met polisie se koppe
2009-10-29 16:25
Johannesburg - Die dwelms waarmee lede van die Wes-Randse polisie na bewering gesmokkel het, was blykbaar so verwarrend dat ‘n kenner ingeroep moes word om ‘n skaars soort heroïen te identifiseer.
“Op een stadium (in 2005) het ons nie geweet of die dwelms wat ons het, kokaïen of heroïen was nie en moes ons Phenyo Phofu roep om te kom help omdat hy die Nigeriërs in die dwelm-industrië goed geken het,” het Norman Kokoeng, ‘n informant, in Johannesburg se hooggeregshof getuig.
Kokoeng getuig in die dwelm- en afpersingsaak van senior supt. Dumisani Jwara (43) en kapts. Landro Mokgosani (39) en Victor Jwili (38).
Na Phofu in Hillbrow opgespoor is, het Jwara en Kokoeng die dwelms aan hom gegee en gewag dat Phofu die middel “by die regte mense gaan toets".
Phofu het ook gesê hy sal ‘n koper vir die dwelms kan kry.
Met sy terugkeer na die motor het Phofu gesê hy kan net sowat R80 000 vir die heroïen kry.
Die mans het toe glo R10 000 aan Phofu vir sy moeite betaal en die res van die geld vir hulself gehou.
Die saak duur voort.
- Sapa