Dwaalkoeël tref seun toe hy hek sluit
2010-01-15 11:35
Johannesburg – ‘n 12-jarige seun van KwaZulu-Natal veg om sy lewe nadat ‘n dwaalkoeël hom Donderdagaand in die kop getref het.
Die seun, wie se identiteit nog nie bekend is nie, was besig om die hek by die oprit van sy ouerhuis te sluit, toe die koeël hom getref het.
Na bewering het ‘n rooftog sowat 50m van waar die seun was, plaasgevind. Verskeie skote is afgevuur en een van die koeëls het die seun getref.
“Nooddienspersoneel het hulle na die toneel gehaas en die jong seun in ‘n plas bloed gevind in ‘n oprit van sy huis in Chatsworth,” het Derrick Banks, ER24-woordvoerder, gesê.
Rooftog:
Volgens Jeff Wicks, Netcare 911-woordvoerder, het ‘n polisieman (wat nie op diens was nie) ‘n aflewering by ‘n haarsalon in Moorcrossweg gemaak. Die salon is oorkant die pad van die jong seun se woning.
“Die polisieman en nog ‘n persoon by die salon is deur twee verdagtes voorgekeer met ‘n mes,” het Wicks gesê.
Die rowers het daarop aangedring dat die mans hulle geld en waardevolle besittings oorhanding.
‘n Selfoon en R5 000 is aan die rowers gegee. ‘n Derde persoon het onverwags om die hoek gekom en die rowers verras.
Een van die verdagtes het ‘n vuurwapen uitgehaal en verskeie skote afgevuur voordat hulle gevlug het.
Een van die koeëls het die seun in die kop getref.
– Sapa