Durbanville-man in hof vir omkopery
2011-10-12 21:04
Kaapstad – ‘n Man van Durbanville het Woensdag in die Spesiale Hof vir Kommersiële Misdaad in Bellville verskyn nadat hy na bewering ‘n verkeersbeampte omkoopgeld aangebied het om ‘n dronkbestuur-dossier te laat verdwyn.
Eduard Floyd Towns (41) het op aanklag van korrupsie voor landdros Amrith Chabilall, wat sy borgtog van R2 000 verleng het, verskyn.
Hy sal weer op 26 Oktober in die hof verskyn.
Die staat beweer Towns het op 14 Mei in die vroeë oggendure na die Durbanville-polisiekantoor gegaan om die vrylating van Christopher Rube, wat vir dronkbestuur in hegtenis geneem is, te verseker.
Luidens die klagstaat het hy eers aan die personeel in die aanklagkantoor gesê hy is ‘n DA-raadslid en hy skenk R25 000 aan die polisiekantoor.
Hy het blykbaar gesê Rube se pa het maandeliks R1 miljoen aan die DA betaal en dat hy (Towns) wil hê Rube moet onmiddellik vrygelaat word.
Toe die polisie Towns se eise geïgnoreer het, het hy na bewering die verkeersbeampte Susan Petersen in die aanklagkantoor genader.
Dit is nie duidelik in die klagstaat of Petersen verantwoordelik was vir Rube se inhegtenisneming nie.
Towns het na bewering vir Petersen “enige bedrag wat jy wil hê” aangebied om Rube se vrylating uit aanhouding te verseker, asook die verdwyning van die dossier.
Luidens die klagstaat het Petersen ook sy aanbod van die hand gewys en dit by senior personeel by die polisiekantoor aangemeld.
Towns is dieselfde aand in hegtenis geneem.
- Volg Nuus24 op Twitter
- SAPA