Durbanse voetganger doodgery

2013-01-06 10:29

Johannesburg – ‘n Voetganger is die naweek dood toe ‘n voertuig hom op die N2 ná die Umgeni-afrit in Durban, KwaZulu-Natal, omgery het, het nooddienswerkers gesê.

Derrick Banks van ER24 sê die man was vermoedelik in sy 30’s.

Hy sê die motor het in die middel van die snelweg gestaan toe paramedici by die toneel opgedaag het. Die voetganger het ‘n paar meter agter die voertuig gelê.

Beide die voor- en agterruit van die motor is beskadig.

Banks sê die pasiënt het traumatiese en noodlottige beserings opgedoen en is op die toneel dood verklaar.

Volgens die woordvoerder het ‘n passasier in die voertuig ligte beserings opgedoen. Die insittende is op die toneel behandel voordat hy na ‘n hospitaal geneem is.

Polisiebeamptes sal die ongeluk verder ondersoek.

Volg Nuus24 op Twitter  

- SAPA