Duisende soldate straks sonder werk

2012-12-05 18:00

Kaapstad – Volgens die weermagvakbond Sandu beplan die Suid-Afrikaanse weermag om 3 000 lede teen die einde van 2015 af te dank, het OFM Woensdag berig.

Die vakbond se Pikkie Greeff sê die afleggings sal na verwagting aanstaande jaar begin.

Hy sê daar word verstaan dat die nasionale tessourie die departement van verdediging opdrag gegee het om hul besteding oor die volgende drie jaar drasties te verminder.

Volgens departementele beplanning sal hierdie vermindering in die vorm van aflegging van duisende soldate plaasvind.

Greeff sê hy is bekommerd dat die departement besluit het om hierdie stappe aan die publiek en die werknemers te probeer wegsteek.

'n Woordvoerder vir die weermag, Xolani Mabanga, sê hy is nie bewus van hierdie bewerings nie en sal later Woensdag kommentaar lewer.

Volg Nuus24 op Twitter.

– OFM