Duisende onnies sit dalk sonder salarisse
2010-04-12 06:36
Alet Rademeyer, Beeld
Johannesburg - Sowat 3 000 tydelike onderwysers in Mpumalanga begin die tweede skoolkwartaal vandag met ’n baie swaar gemoed omdat hulle nie weet of hul kontrakte einde vandeesmaand hernu gaan word nie.
Etresia Raubenheimer, provinsiale sekretaris van die Suid-Afrikaanse Onderwysersunie (SAOU) in Mpumalanga, het gesê sy is oorval deur klagtes van onderwysers wat nie meer die onsekerheid kan verduur nie.
“Hulle is reeds per SMS ingelig dat hul lidmaatskap aan Gems, die staatsdiens se mediese fonds, einde vandeesmaand verval.”
Raubenheimer het gesê herhaalde pogings het misluk om met amptenare in die departement te kommunikeer.
Die onderwysers se kontrakte verstryk op 30 April.
As die departement dit nie betyds verleng sodat hul name op die Persal-stelsel (die regering se betaalstelsel) bly nie, gaan hulle nie vandeesmaand betaal word nie.
Die Persal-stelsel sluit reeds Vrydag.
Dit sal nie die eerste keer wees dat tydelike onderwysers in dié provinsies met die hande in die hare sit nie.
Die departement het in die verlede verskeie kere in nagelaat om tydelike onderwysers se kontrakte betyds te hernu. Dít het meegebring dat hulle weke sonder ’n salaris moes werk.
Raubenheimer het gesê wat die situasie vererger, is dat van dié onderwysers reeds sedert 2008 en verlede jaar in tydelike poste is.
“Hulle wil weet wanneer daar eendag vir hulle stabiliteit in die onderwysstelsel gaan kom.”
Jasper Zwane, onderwyswoordvoerder in Mpumalanga, het nie gister sy selfoon beantwoord nie.
-Beeld