Duisende misdadigers word nooit gevang
2010-09-12 07:09
Herman Scholtz en Llewellyn Prince
Johannesburg - Baie van die misdadigers wat verantwoordelik was vir die sowat 2,1
miljoen misdaadvoorvalle van April 2009 tot Maart 2010 loop nog vry
rond.
Luidens die polisie se jongste misdaadstatistieke, wat
Donderdag bekend gemaak is, het die polisie wel sukses behaal met die
bekamping van sekere geweldmisdade.
Die moordsyfer vir April 2009
tot Maart 2010 het met 8,6% afgeneem en dié vir poging tot moord met
6,1%. Dit is die eerste jaar sedert 1995 dat minder as 17 000 mense in
een jaar vermoor is.
Maar die polisie het nie bekend gemaak hoeveel mense in die verskillende misdaadkategorieë in hegtenis geneem is nie.
Van
die inhegtenisnemingsyfers wat wel bekend is, hou verband met roof met
verswarende omstandighede (18,4%); moord (68,2%); en seksmisdade
(38,5%).
Dié betreklik lae syfers strook met die statistieke van
die nasionale vervolgingsgesag (NVG) vir dieselfde tydperk, waarvolgens
net sowat die helfte (1,04 miljoen) van die misdaaddossiere wat geopen
is hulle bereik het.
Van dié sake is byna ’n kwart (242 103)
teruggetrek. Nog 50 361 beskuldigdes is op afwentelingsprogramme
geplaas, en uiteindelik is net meer as 355 000 sake afgehandel.
Die skuldigbevindingsyfer vir sake wat wel verlede jaar afgehandel is, is 88,6%.
Adv.
Menzi Simelane, hoof van die NVG, het vroeër vandeesmaand tydens ’n
seminaar van die Instituut vir Sekerheidstudies (ISS) gesê die NVG se
groot kopseer is om genoeg bewyse van die polisie te kry om beskuldigdes
suksesvol te vervolg.
Getuies daag nie op nie, bewysstukke raak
weg en die sake word dan herhaaldelik uitgestel. Die land se howe sit
tans gemiddeld net 3 ure en 40 minute per dag.
Simelane het gesê
die NVG se agterstand raak elke jaar groter en dat die hersiening van
die strafregstelsel oplossings sal moet vind.
David Bruce,
senior navorser by die Sentrum vir die Studie van Geweld en Versoening,
sê nêrens ter wêreld beland 100% van misdadigers in ’n hof nie.
“Die
strafregstelsel in Suid-Afrika is ongelyk as dit by doeltreffendheid
kom, maar ons het nie die slegste strafregstelsel ter wêreld nie.”
Hy sê hoewel die regering massiewe beleggings in die strafregstelsel gemaak het, tree die polisie baie selektief op.
“Hulle
hanteer nie die hart van die probleem van geweld – dat dit eintlik
grootliks in die armste gebiede in Suid-Afrika gepleeg word –
doeltreffend nie.
“As hulle geweld wil aanpak, moet hulle eerder
op dié gebiede fokus. Die polisie se fokus is op hul ‘trio-misdade’
(huisrooftogte, sakerooftogte en voertuigkapings).”
Bruce is ook bekommerd oor die betroubaarheid van polisiestatistieke.
“Die
afgelope ses jaar hou die polisie nie die statistieke gereeld by nie.
My kommer is dat dit ’n groot impak op statistieke in die land het. Om
dié rede is dit dus moeilik om iets wys te word uit die statistieke wat
uitgereik is.”
Drr. Chandré Gould, Johan Burger en Gareth
Newham van die ISS sê uit die misdaadstatistieke is dit duidelik dat om
bloot die aantal polisielede te vermeerder of die polisiebegroting te
vergroot, nie vinnig resultate gaan oplewer nie.
“Dit is
gedeeltelik omdat polisiëring min kan doen om kontakmisdade soos moord,
aanranding, seksuele oortredings en huishoudelike geweld te verhoed.”
- Rapport