Duisende herdenk ikoon se vryheid
2010-02-11 07:36
Alicestine October
Kaapstad - Sowat 20 000 mense word Donderdag by die destydse Victor Verster-gevangenis buite die Paarl verwag om oudpres. Nelson Mandela se vrylating daar vandag 20 jaar gelede te herdenk.
Die gevangenis, waarvan die naam intussen na die Drakenstein-gevangenis verander is, is Woensdag ook tot nasionale erfenisgebied verklaar, berig Sapa.
“Vandag erken die nasionale erfenisraad dié gebied en die huis (op die terrein) waar Mandela gebly het as een van die skaars ikone van die nasionale bevrydingserfenis,” het mnr. Sonwabile Mangcotywa, uitvoerende hoof van die nasionale erfenisraad, gesê.
Die vieringe vandag sluit volgens die ANC onder meer ’n ontbyt met ANC-lede by die gevangenis in, asook ’n simboliese optog wat Mandela se treë tydens sy vrylating verteenwoordig.
Pres. Jacob Zuma sal dan die besoekers toespreek.
Mandela sal nie dié verrigtinge bywoon nie, maar wel die staatsrede Donderdagaand.
Oudpres. F.W. de Klerk, wat by verskeie geleenthede vandeesweek dwarsklappe van ANC-swaargewigte moes verduur, het gister erkenning gegee aan die spesiale betekenis van die viering.
Mense soos Fikile Mbalula, koördineerder van ANC-veldtogte, en Ahmed Kathrada, het De Klerk se besluit om Mandela vry te laat as “die enigste uitweg” bestempel.
Mbalula het onder meer gesê die land is nie bevry vanweë De Klerk se genade nie.
De Klerk het gister in ’n verklaring beklemtoon die gebeure van Februarie 1990 af was ’n oorwinning vir alle Suid-Afrikaanse gemeenskappe.
“Wanneer ons die vrylating van Nelson Mandela vandag vier, moet ons dit met die wete doen dat ons nuwe grondwetlike demokrasie die skepping van al ons mense en al ons gemeenskappe is.
“Ons moet die dag vier deur onsself opnuut te verbind tot die doel van nasionale versoening – oudpresident Mandela se grootste nalatenskap aan ons mense.”
Opposisiepartye het egter gister die ANC se veldtog te midde van die vieringe van oudpres. Nelson Mandela se vrylating as politieke opportunisme bestempel.
Die ANC het lede van sy nasionale uitvoerende komitee in die Wes-Kaap ontplooi om die provinsiale taakspan te help met die opbou van ANC-takke hier.
Alles word nou in die stryd gewerp vir die herstelproses en om sodoende uiteindelik die Wes-Kaap in die provinsiale verkiesing van 2011 uit die hande van die DA te raap.
Helen Zille, Wes-Kaapse premier, het gesê dit is inderdaad politieke opportunisme.
“Hoe meer hulle op Mandela se erfenis ry, hoe verder weg beweeg hulle van Mandela se visie.”
Volgens haar gaan geen deur-tot-deur-veldtog die ANC in die Wes-Kaap red nie.
“Die mense soek konkrete goed wat hulle kan sien, nie net simboliek nie.”
Ook Phillip Dexter, Cope-woordvoerder, het gesê die ANC sal veel meer uitrig indien hy minder tyd aan “populistiese nonsens” spandeer.
“Mense is moeg. ’n Mens kan dit sien met al die byeenkomste wat die party vandeesweek byeengeroep het. Die meeste daarvan het gefaal.
“In Guguletu was daar byvoorbeeld te min mense en (pres. Jacob) Zuma het nooit opgedaag nie.”
- Die Burger