Duimgooiers vermoor man, verkrag vrou
2012-02-24 22:54
Johannesburg – Duimgooiers het ‘n man vermoor en ‘n vrou verkrag nadat hulle die rylopers ‘n rygeleentheid naby Zeerust aangebied het, het die polisie in die Noordwes gesê.
Twee mans en ‘n vrou was besig om in 'n Toyota Prado na Johannesburg te ry toe hulle stilgehou het om twee rylopers op te laai, het brig. Thulane Ngubane Vrydag gesê.
Ngubane sê die voorval het Donderdagoggend gebeur.
Die duimgooiers het op die N12 naby Stilfontein in die voertuig ‘n vuurwapen en 'n hamer uitgeruk.
Een van hulle het die pistool op die bestuurder gerig terwyl die ryloper met die hamer, die twee passasiers aangerand het.
Die verdagtes het vir die bestuurder gesê sy moet omdraai en via Delareyville terugry.
Daarna het die rylopers die twee passasiers uit die motor gestoot. Een van die passasiers het aan sy beserings beswyk.
Die duimgooiers het in Delareyville stilgehou en die vrou na ‘n veld gesleep en haar daar verkrag. Hulle het haar kaal gelos.
Die mans het in die vrou se motor met R140 000 kontant en twee selfone op die vlug geslaan.
Polisiebeamptes wat die gebied gepatrolleer het, het op die vrou afgekom en haar na die Delareyville-polisiestasie geneem. Die vrou se motor is op ‘n nabygeleë plek gevind.
Sy is na ‘n plaaslike hospitaal geneem. Haar oorlewende passasier is met ernstige kopbeserings in ‘n ander hospitaal opgeneem.
Die polisie ondersoek sake van moord, poging tot moord, motorkaping en verkragting.
Volg Nuus24 op Twitter
- SAPA