Drywer nog vasgekeer ná treinongeluk

2013-01-31 08:37

Van die beseerdes word op die toneel behandel. (@aletpretorius, via Twitter)

Johannesburg – Die bestuurder van 'n trein wat op die spoorlyn tussen Cor Delfos en Saulsville naby Pretoria teen 'n ander trein gebots het, is steeds in die kajuit vasgekeer, het die Tshwane-nooddienste gesê.

Johan Pieterse, woordvoerder, het gesê een van die treine het op die spoor stilgestaan toe die ongeluk plaasgevind het.

"'n Paar mense is ernstig beseer en die drywer van een van die treine het kritieke beserings opgedoen. Hy is steeds in die trein vasgekeer."

Pieterse het gesê die spoorlyn tussen Cor Delfos en Saulsville is weens die ongeluk gesluit.

Lillian Mofokeng, woordvoerder vir Metrorail, het gesê minstens 20 mense is in die ongeluk beseer. Sy het bevestig dat treindienste op dié lyn vir minstens 'n paar uur tot stilstand sal kom.

"Ons probeer om busse beskikbaar te stel, maar ons is nog nie seker of dit gaan gebeur nie. Ons ondersoek al die opsies." 

– Volg Nuus24 op Twitter

- SAPA