Druipnat rowers uit dam getrek
2011-08-24 20:24
Johannesburg – Twee mans is Woensdag in hegtenis geneem nadat hulle na bewering ‘n Pakistanse man se winkel naby Kwaggafontein beroof en toe in ‘n dam weggekruip het, het die polisie in Mpumalanga gesê.
Drie mans het die winkel in Vlaklaagte omstreeks 09:00 binnegegaan en die eienaar met ‘n geweer aangehou, het ao. David Mahlangu gesê.
Hulle het hom vasgebind en vier selfone, sigarette en ‘n onbekende hoeveelheid kontant gesteel.
Toe die rowers gevlug het, het ‘n polisievoertuig en ‘n groep inwoners hulle agternagesit.
“Een van die mans het daarin geslaag om weg te hardloop, terwyl sy twee vermeende makkers in ‘n dam ongeveer 500 meter van die winkel gespring en in die water weggekruip het,” het Mahlangu gesê.
Nadat hulle mettertyd oorreed is, het die druipnat mans uit die water geklim.
Hulle het probeer om onderwater na die ander kant van die dam te swem en verder te vlug, maar hulle het gefaal.
Die polisie soek na hul twee gewere in die water, het Mahlangu gesê. Die gesteelde goedere is nie teruggevind nie.
Die verdagtes, onderskeidelik 19 en 22 jaar oud, sal eersdaags in die hof verskyn.
- Volg Nuus24 op Twitter
- SAPA