Droogte knou Soutpansberg
2010-01-27 10:11
Kaapstad - Die droogte in die gebied noord van die Soutpansberggebied is besig om krisis-afmetings aan te neem.
Dit is veral dele in die noordooste in die voormalige Republiek van Venda, wes van Musina en tussen Alldays en Swartwater wat die ergste onder die droogte gebuk gaan.
Die reënneerslae wat gedurende Desember oor die Soutpansberggebied geval het, het kol-kol voorgekom en die dagtemperature van tot hoog in die 30 en lae 40 grade wat sedert die begin van 2010 ondervind word, vererger die situasie.
Boere in die gebied erken egter dat Januarie tradisioneel ‘n droër maand is terwyl dit tot in Mei warm genoeg is dat die gras nog kan groei. Boere is hoopvol dat goeie reënneerslae in Februarie en Maart sal voorkom.
Die droogte het reeds ‘n groot invloed op die wild- en veegetalle in die gebied. Talle wildvrektes kom sedert verlede jaar voor en van die wildboere het reeds tot 20 koedoebulle verloor. Heelparty van dié diere was van trofeegehalte.
Dit is allerweë bekend dat koedebulle en vlakvarke die eerste wild is wat tydens droogtetye vrek. Die vrektes kom voor ten spyte daarvan dat boere hulle wild van bykomende voer voorsien.
Vir die volledige storie, besoek Landbou.com