Dronkbestuur neem toe met meer as 10%
2010-09-12 07:31
Johannesburg - Die TV-aanbieder Loui Fish se
inhegtenisneming weens beweerde dronkbestuur die afgelope week in
Sandton het die vervolging van beweerde dronkbestuurders in die kollig
geplaas.
Fish is deur die polisie op borgtog van R1 000 vrygelaat en haar eerste hofverskyning is in September volgende jaar.
Lt.kol. Eugene Opperman, Gautengse polisiewoordvoerder,
het by navraag gesê dit is omdat daar na verwagting lank gewag gaan word
op die uitslag van Fish se bloedalkoholtoets. Vermeende
dronkbestuurders wag maande en selfs jare om verhoor te word.
Luidens die polisiestatistieke wat Donderdag bekend
gemaak is, is 62 939 motoriste van April 2009 tot Maart 2010 vir
dronkbestuur aangekeer, ’n toename van 10,6%.
Die styging in die voorkoms van dronkbestuur het politici genoop om te vra vir strenger wetgewing.
Daar is egter vrae oor hoe doeltreffend die
vervolging van dronkbestuurders is. Die Blou Bul-stut Bees Roux staan
benewens moord ook tereg op aanklag van dronkbestuur, maar geen toetse
is gedoen om sy bloedalkoholvlak te meet nie.
Wanneer bloedmonsters wel geneem word, kan die forensiese laboratoriums nie byhou nie.
Mike Waters, DA-LP, sê die agterstande is enorm.
In Kaapstad neem dit tot 21 weke om bloedmonsters te ontleed, in
Pretoria 18 weke en in Johannesburg 3 jaar.
- Rapport