Dronk kinders versuur Kansa-dag
2011-03-15 09:08
Welkom - Die vierde Kansa-Aflos vir die Lewe wat die afgelope naweek in Welkom gehou is, is versuur deur dronk skoolkinders wat na bewering selfs tydens die emosionele kersligseremonie vir afgestorwenes kos en ander besittings by kraampies en uit ander mense se koelhouers gesteel het.
Ondanks die sukses van die nag-lange afloswedloop, die grootste wêreldwye geldinsamelingsprojek vir kanker, gaan die bestuur voortaan skoolspanne verbied.
Marzaan Venter, Kansa se projekkoördineerder, sê die polisie is Saterdagnag vier keer uitgeroep na die Welkom-klub, waar die afloswedloop aangebied is.
Die polisie, sekuriteitsbeamptes en bestuur kon nie die kinders van verskeie Welkomse skole keer nie. Die kinders het drie hekke oopgedwing en oor die heining geklim het.
Sy sê talle sakke is deurgesoek en daar is op baie drank beslag gelê, maar ander bottels vol drank is weer net oor die heinings na binne gegooi.
Die oppassers van die oortreders kon nie deur Kansa se bestuur in die hande gekry word nie.
Voordat mense wat kanker oorkom het aan die begin van die aand die eerste “oorwinningsronde” om die baan gestap het, was daar reeds afkondigings dat drank en dronk mense nie op die baan toegelaat word nie.
Skoolhoofde van die betrokke skole sal nou gekontak word en briewe sal deur Kansa aan die skole gestuur word.
Venter sê mense was geskok en ontsteld en talle het aangedui dat hulle nie weer die byeenkoms gaan ondersteun nie.
“Dit is nie al die skole se kinders wat hul wangedra het nie. Daar was skoolspanne in skooldrag wat werklik by die reëls gehou het. Hulle het ook ouers en onderwysers gehad wat hulle opgepas het en het selfs die volgende oggend gehelp opruim. Die volgende Aflos vir die Lewe, as daar weer een gaan wees, sal ’n korporatiewe geleentheid wees met geen skoolspanne nie en geen jeugdige sal sonder toesig by die hekke ingelaat word nie.”
Venter bied verskoning aan almal wat hul kant gebring het om van die aflos ’n sukses te maak. Sy belowe dat só iets nie weer sal gebeur nie.
Altesaam 105 ingeskrewe spanne het die naweek aan die Welkom-aflosbyeenkoms deelgeneem en nog 2 571 ander mense het dit amptelik bygewoon.
- Volksblad