Dronk bestuurder eis lewe

2012-08-12 08:51

Johannesburg – 'n Man is in hegtenis geneem ná hy met sy motor in twee ander motors op die N3 in Germiston vasgejaag het.

Een man is in die ongeluk dood en drie beseer, het die Ekurhuleni-metropolisie gesê.

"'n 28-jarige [man], wat teregstaan op 'n aanklag van dronkbestuur, het erken dat hy een drankie te veel gehad het," het insp. Kobeli Mokheseng gesê.

"Dit lyk of hy ten tye van die ongeluk alleen in die voertuig was en hy het nie enige sigbare beserings opgedoen nie."

Mokheseng het gesê 'n 33-jarige man is deur paramedici op die toneel dood verklaar.

"'n Negejarige seun is na die Union-hospitaal vir mediese behandeling geneem weens die ernstige beserings wat hy opgedoen het," het hy gesê.

"'n Voorlopige ondersoek dui daarop dat [een] bestuurder op die N3 in die rigting van Pretoria op een of ander manier agter die stuurwiel aan die slaap geraak het..."

'n Saak van strafbare manslag is by die Germiston-polisiestasie geopen.

– Volg Nuus24 op Twitter.

- SAPA