Dringende ondersoek kom oor mediese afval
2010-01-23 10:36
Sandra Coetzee
Bloemfontein - ’n Dringende strafregtelike ondersoek is begin na bewerings van tonne gevaarlike mediese afval van hospitale in die noordelike provinsies sowel as die Vrystaat en Noord-Kaap wat glo op ’n onveilige en onwettige wyse gehanteer is.
Die Groen Skerpioene in Booysens in Johannesburg het ’n ondersoek na Psychem Waste Solutions, ’n verwyderaar van mediese afval, ingestel nadat onwettige gebergde mediese afval glo by ’n perseel in Johannesburg gekry is.
Mnr. Albi Modise, hoofdirekteur van kommunikasie van die departement van omgewingsake in Pretoria, het aan Volksblad bevestig dat die departement eers in die nuwe jaar bewus geword het van die probleme rondom Psychem Waste Solutions rakende bewerings van onwettige berging van mediese afval en ander beweerde oortredings van regulasies.
’n Strafregtelike klag is reeds geregistreer by die Booysens-polisiestasie in Johannesburg.
Volgens Modise het die ondersoek deur die Groen Skerpioene op 8 Januarie op ’n perseel in Booysens begin.
“Psychem het toe stappe gedoen om dringend die onwettige gebergde afval te vernietig en sertifikate van veilige vernietiging aan die departement verskaf,” sê Modise.
Psychem se optrede oor die feestyd word bevraagteken nadat daar glo ’n agterstand in die verwydering van tonne mediese afval by onder meer etlike hospitale in die Vrystaat, Noord-Kaap, Gauteng ontstaan het. Dit was die gevolg van maatskappye met verbrandingsoonde wat weens agterstallige rekenings geweier het om Psychem se afval te vernietig.
In die Vrystaat bedien Psychem 24 hospitale. Maandeliks word meer as 32 ton mediese afval by dié plekke alleen afgehaal.
Die een diensverskaffer is glo nog dié week R4 miljoen geskuld.
Psychem het glo ’n diensverskaffer in Johannesburg gekry om die afval te vernietig, nadat Psychem eers geld moes deponeer.
Na verneem word, is van die afval van die Vrystaat na Johannesburg vervoer om vernietig te word. Dit is nog onbekend of al die mediese afval van die Vrystaat en Noord-Kaap vernietig is.
Kragtens regulasies moet mediese afval ná die ontvangstyd in ’n warm klimaat binne 48 uur vernietig word. As daar koelkamers is waarin afval teen ’n temperatuur van -2 grade Celcius geberg word, kan dit langer geberg word.
Dit was egter glo nie die geval by Psychem nie. Foto’s aan Volksblad verskaf, wys waar mediese afval – waaronder patologiese en besmetlike afval – agter in ’n perseel in onaanvaarbare houers geberg word.
Volksblad se navraag aan Ludwig Hartmann en Suzette Hartmann, eienaars van Psychem, is summier met ’n prokureursbrief beantwoord.
Psychem sê hy gaan voort om afval te berg en vernietig soos hy kontraktueel verbind is, en binne die toelaatbare maatreëls.
Psychemhet geweier omVolksblad se vrae oor sy finansiële situasie te beantwoord omdat dit “nie van openbare belang” is nie.
Toe Volksblad se verslaggewer daarop wys dat die saak wel van openbare belang is omdat Psychem met belastingbetalers se geld betaal word en die beweerde onwettige berging van mediese afval risiko’s vir mense en die omgewing kan inhou, is die koerant gedreig met ’n hofbevel dat geen onware en skadelike bewerings gepubliseer mag word nie.
Psychem se prokureurs het gister teen druktyd nog nie aan Volksblad die naam van die diensleweraar verskaf wat die Vrystaat en Noord-Kaap se mediese afval oor die feestyd vernietig het nie, hoewel die navraag reeds Woensdag gerig is.
Hulle het ook nie terugvoer gegee om die inhoud van die foto’s te verduidelik nie.
- Volksblad