Driepunt-plan in stryd teen MIV/vigs
2009-12-01 08:10
Elsabé Brits
Kaapstad - Die stryd teen MIV/vigs in die Wes-Kaap word na ’n hoër vlak geneem met die aankondiging van drie nuwe inisiatiewe om mense met die siekte gouer op te spoor en te behandel.
Dié aankondiging is gister, voor Wêreld-vigsdag vandag, deur Theuns Botha, Wes-Kaapse minister van gesondheid, gedoen.
Hy het op ’n nuuskonferensie gesê mense in die Wes-Kaap sal voortaan antiretrovirale middels (ARM’s) ontvang wanneer hul CD4-telling laer as 350 is, en nie meer 200 nie. Alle MIV-positiewe babas jonger as een jaar sal ARM’s kry, ongeag wat hul CD4-telling is.
Na raming sal 50 000 bykomende pasiënte eenmalig op dié behandeling geplaas moet word en daarna sowat 20 000 per jaar.
Hoewel nie alle pasiënte altyd die behandeling vra nie, word daar voorspel dat tussen 6 000 en 20 000 bykomende mense in die Wes-Kaap ARM’s sal benodig. Dit sal sowat R16 miljoen kos.
“Ek sou nie die aankondiging gedoen het as ek nie baie seker was dat ons die geld sal kry nie,” het Botha gesê. Hy het die nasionale regering en die private sektor genader vir geld.
Tans kry 70% tot 80% van die mense in die Wes-Kaap wat die medisyne benodig dit. Elke maand kom daar tussen 1 500 en 1 800 nuwe pasiënte by wat ARM’s kry.
Roetine-toetsing vir MIV sal as standaardsorg beskikbaar wees by alle openbare gesondheidsinstellings in die Wes-Kaap. Tans word toetse net vrywillig gedoen en mense moet daarvoor vra; dit word nie aangebied nie.
“Daar is geen plan om MIV-toetse verpligtend te maak nie, maar die klem het verskuif van konvensionele, vrywillige MIV-berading en toetsing na ’n roetine-aanbod. Die pasiënt kan nee sê.”
Prof. Keith Househam, Wes-Kaapse hoof van gesondheid, het gesê dit beteken die sowat 5 miljoen mense wat jaarliks die provinsie se gesondheidsinstellings besoek, gaan nie meer net deur die stelsel vloei “sonder om die opsie van ’n toets gegee te word” nie.
Pasiënte sal steeds ná die toets berading kry, ongeag of hulle positief of negatief toets.
Die oordrag van MIV tussen ma en baba in die Wes-Kaap is 4%, die laagste in die land, en die provinsie wil dit heeltemal uitwis.
Gedurende die ma se swangerskap en geboorte ontvang die ma en baba tans twee ARM’s. Die provinsiale gesondheidsdepartement gaan dit verhoog na drie.
Al drie inisiatiewe sal binne die volgende jaar deurgevoer word. Botha het gesê hy hoop dit sal teen die begin van 2011 ten volle in werking wees. Volgens hom is die inisiatiewe nodig sodat daar binne vyf tot tien jaar werklik ’n verskil gemaak kan word in die stryd teen MIV/vigs.
- Die Burger