Drie vas wat kerke wou aanval
2011-11-25 21:03
Johannesburg – Drie mans wat aan ‘n regsgesinde groep behoort
is in hegtenis geneem nadat hulle ‘n terreuraanval op kerke in Naboomspruit
beplan het.
Brigadier Hangwani Mulaudzi sê die drie is op ‘n
plaas naby Naboomspruit (Mookgopong) vasgetrek.
Die mans is in hegtenis geneem nadat die
polisie na die plaas ontbied is om ‘n voorval van brandstigting te ondersoek.
“Polisiebeamptes het gesien dat die plaas as ‘n
opleidingsentrum vir sekuriteitswagte gebruik word.
“Dié wagte word dan deur plaaseienaars
aangestel,” het brigadier Mulaudzi gesê.
Hy sê die drie mans het opleiding op die plaas
ontvang maar is uitgeskop nadat hulle moeilikheid veroorsaak het.
Die mans het Donderdagaand na die plaas
teruggekeer en die eiendom onwettiglik betree.
‘n Argument het tussen die mans en inwoners op
die plaas ontstaan waarna hulle klaarblyklik twee tente aan die brand gesteek het.
Brigadier Mulaudzi sê dat polisiebeamptes
verskeie tuisgemaakte wapens, koeëlvaste baadjies, helms en knuppels oortrek
met skerp punte sowel as bestanddele wat waarskynlik vir die vervaardiging
van bomme gebruik word, gevind het.
“Die polisie het uitgevind dat die verdagtes
deel is van ‘n godsdienstige kultus-groep en dat hulle beplan om kerke aan te
val.
“Hulle glo dat daar slegs wit mense in
Suid-Afrika moet woon en dat die res vermoor moet word.
“Pamflette wat moontlik okkulties van aard is,
is ook op die plaas gevind,” het Malaudzi gesê.
Daar was foto's van verskeie kerke op die drie mans se kameras en selfone gevind.
Hulle is op aanklagte van brandstigting en die
besit van gevaarlike wapens in hegtenis geneem.
Die verdagtes sal Maandag in die
Naboomspruit-landdroshof verskyn.
Volg Nuus24 op Twitter.
- SAPA