Drie vas vir roof, verkragting
2010-09-07 14:01
Johannesburg – Drie mans is Dinsdagoggend in Gonubie in hegtenis geneem vir hul betrokkenheid by ‘n huisroof en verkragting, het polisie in die Oos-Kaap gesê.
Die mans, wat tussen die ouderdomme van 24 en 25 is, is in die Mxamomhle informele nedersetting in hegtenis geneem nadat ‘n 54-jarige vrou en haar man glo deur twee van die mans in hul huis aangerand is, het lt. kol. Mtati Tana gesê.
“Hulle het glo die man vasgebind, die vrou verkrag en elektriese toebehore, ‘n selfoon, juweliersware en kontant geneem.
“Die twee is in hegtenis geneem toe hulle in besit van die toebehore en juweliersware gevind is. Hulle het gevolglik die derde persoon, aan wie hulle die selfoon verkoop het, geïdentifiseer.”
Die groep sal na verwagting Woensdag in die landdroshof in Oos-Londen verskyn vir huisbraak, verkragting en die besit van gesteelde eiendom.
Volg Nuus24 op Twitter
- SAPA