Drie vas vir moord, rooftog by vulstasie in VS
2013-01-10 11:30
Kaapstad – Drie verdagtes is die week in verband met ‘n moord en rooftog by ‘n vulstasie in Kragbron, naby Sasolburg, in hegtenis geneem, het die polisie gesê.
Peter Kareli, ‘n polisiewoordvoerder, het in ‘n mediaverklaring gesê vier gewapende mans het die naweek die petrolstasie binnegestorm en geëis dat ‘n bejaarde man, wat saam met sy vrou in die kantoor gesit het, vir hulle olie gee.
Luidens die verklaring het die man die paniekknoppie probeer druk, maar die verdagtes het op hom begin skiet. Hy is later op die toneel dood verklaar.
Kareli sê een van die rowers het ‘n kontantboks in die kantoor gegryp en met ‘n onbekende hoeveelheid geld weggekom.
Een van die verdagtes is in Oranjeville in die provinsie in hegtenis geneem, terwyl die ander twee in Orange Farm in Gauteng aangekeer is.
Die verdagtes sal binnekort op aanklag van moord en roof verskyn.
Volgens die polisie is ‘n vierde verdagte steeds soek.
Volg Nuus24 op Twitter
