Drie vas vir R43 milj. se mandrax

2012-06-30 23:00

Johannesburg – Drie Zambiërs is Saterdag in Johannesburg in hegtenis geneem vir die besit van dwelms met 'n geskatte straatwaarde van R43 miloen, het die polisie in Gauteng gesê.

Kaptein Pinky Tsinvane het gesê die mans is deur die Valke in hegtenis geneem nadat hulle 'n wenk ontvang het.

Sy het gesê die verdagtes se vragmotor is van die pad getrek en deursoek.

"Die vragmotor het gelyk asof dit leeg was, maar polisielede het 'n vals kompartement met sakke vol mandrax-tablette gevind."

Die vragmotor het blykbaar vanaf Tanzanië gekom en het Suid-Afrika by die Botswana-grens binnegegaan.

Die mans, tussen die ouderdom van 32 en 40, sal na verwagting in die Randfontein-landdroshof op aanklagte van dwelmhandel verskyn.

Volg Nuus24 op Twitter.

- SAPA