Drie vas vir Hibberdene-moord
2010-07-23 09:07
Durban – Drie verdagtes is in hegtenis geneem nadat die lyke van ‘n bejaarde egpaar in Hibberdene agter in hul eie motor gevind is, het die polisie in KwaZulu-Natal Vrydag gesê.
“Drie mans is Donderdag in verband met die moorde op Christopher en Jennifer Early vasgetrek,” het kol. Jay Naicker, polisiewoordvoerder, gesê.
‘n Verbyganger het verlede week op die egpaar se Volvo afgekom waar dit langs die pad gestaan het. Die polisie het ondersoek ingestel en die bejaardes se lyke agter in die motor gevind.
Die Early-egpaar het in Woodgrange, Hibberdene gewoon. Hulle huis is glo ook deur die verdagtes geplunder.
Na bewering is die slagoffers in hul huis oorval, beroof en vermoor. Daarna is die egpaar se lyke in hul motor gelaai wat later langs die pad gelaat is.
“Die polisie het ook twee vuurwapens, waarvan een aan die slagoffers behoort het, in die verdagtes se besit gevind. Hulle het ook ses selfone in hulle besit gehad. Twee van die selfone het aan die Early-egpaar behoort.”
Verskeie ander besittings is ook tydens die klopjag in die mans se besit gevind.
Die verdagtes sal Maandag in Hibberdene in die landdroshof verskyn en staar aanklagte van moord en gewapende roof in die gesig.
Volg Nuus24 op Twitter.
- SAPA