Drie vas ná rooftog by supermark
2009-12-03 10:09
Johannesburg - Drie van die sewe mans wat glo vroeër vandeesweek 'n Spar-supermark in Primrose beroof het, is in hegtenis geneem.
Kapt. Steady Nawa, 'n polisiewoordvoerder, het gesê 'n sekerheidswag is in die rooftog, wat Woensdag plaasgevind het, gewond.
Die mans is ure later in hegtenis geneem ná die polisie 'n wenk van die gemeenskap ontvang het.
"Die polisie het die inligting opgevolg en het 'n verdagte in hegtenis geneem. Dié verdagte het twee ander verdagtes gaan uitwys en hulle is ook in hegtenis geneem. Die polisie het ook beslaggelê op drie vuurwapens."
Nóg 'n vuurwapen is in 'n straat naby die misdaadtoneel gevind.
Die vier ander rowers is nog op vrye voet en die polisie vra dat enigiemand met inligting die Germiston-polisiekantoor by 082 457 0636 bel.
– Sapa