Drie vas ná plaasmoord
2009-09-28 14:05
Johannesburg – Drie mans is in hegtenis geneem vir die moord op ‘n KwaZulu-Natalse plaaswerker.
Volgens insp. Joey Jeevan is die mans Saterdag en Sondag deur die georganiseerde misdaadseenheid in hegtenis geneem.
Erasmus Mncube is op 16 September vanjaar tydens ‘n gewapende rooftog op die God's Grave-plaas in Nottingham Road vermoor. Hy is in die kop geskiet.
Die rowers het die plaas se kluis geplunder en twee vuurwapens, kontant, kredietkaarte en selfone gesteel.
“Tydens die inhegtenisname is daar beslag gelê op ‘n 9mm-pistool wat glo die moordwapen is. Selfone en buitelandse valuta wat tydens die aanval gesteel is, is ook gevind,” het Jeevan gesê.
Die drie mans, wat tussen die ouderdomme van 27 en 30 is, sal binnekort in die Howick landdroshof verskyn.
- Sapa