Drie vas ná moord op seun (8)

2012-09-06 22:55

Johannesburg – Drie mans is in hegtenis geneem in verband met die moord op 'n agtjarige seun en 'n aanval op 'n vrou in Kaapstad, het die Wes-Kaapse polisie Donderdag gesê.

Die eerste man is Saterdag in hegtenis geneem, het kapt. Frederick van Wyk, polisiewoordvoerder, gesê.

Nóg twee mans is Donderdag ná verdere ondersoeke in hegtenis geneem.

Die seun, Junaid McKenzie, is op 27 Junie by Melody-plein in Steenberg doodgeskiet.

"Hy het naby die mense, wat dominoes onder 'n lamppaal gespeel het, gespeel. Skote is afgevuur en hy is getref. 'n 32-jarige vrou is in die rug geskiet," het Van Wyk gesê.

Junaid het weens sy beserings in die hospitaal beswyk.

Drie mans sal binnekort op aanklagte van moord en poging tot moord in die Wynberg-landdroshof verskyn.
      
– Volg Nuus24 op Twitter

- SAPA