Drie vas ná Muldersdrif-meisie se bure ook geskiet word
2012-09-14 11:04
Johannesburg – Inbrake in Muldersdrif het in ‘n skietery met die polisie ontaard en tot die inhegtenisname van drie vermeende rowers gelei.
Lt.kol. Katlego Mogale sê die eerste rooftog het Donderdag net ná 19:00 plaasgevind. ‘n Vyf-en-vyftigjarige man is in dié voorval gewond.
Hy het saam met ‘n groep mense op die stoep gesit toe drie of vier rowers opgedaag het.
Die groep het by die huis ingehardloop, waarna die man geskiet is.
Terwyl polisiebeamptes dié rooftog ondersoek het, het hulle oproepe oor ‘n tweede aanval gekry.
Polisiebeamptes het die rowers na ‘n veld naby die N14 se Swartkop-afrit agtervolg, waarna ‘n skietery uitgebreek het.
Een vermeende rower is geskiet en twee ander is vasgetrek. ‘n Vierde man het op die vlug geslaan. Die rower wat gewond is, is na ‘n hospitaal geneem.
Die polisie het beslag gelê op klere, twee plasma-televisies, selfone en twee ongelisensieerde vuurwapens.
Mogale sê die polisie ondersoek ‘n moontlike verband tussen dié inbrake en verlede week se aanval op Alyssa Botha (13) en haar gesin.
Dié slagoffer, haar 17-jarige suster en hul pa is verlede week aangeval toe hulle na hul huis teruggekeer het.
Die mans het die gesin gedwing om uit hul motor te klim, waarna die rowers hul selfone gevat voordat hulle die gesin geskiet het.
Die pa en sy twee dogters is na ‘n hospitaal gehaas, waar die jongste tiener met haar aankoms gesterf het.
Volg Nuus24 op Twitter
- SAPA
