Drie van Sassa vas vir bedrog
2010-07-07 13:36
Durban – Drie werkers van die Suid-Afrikaanse Maatskaplike-sekerheid-agentskap (Sassa) gaan Woensdag in die Mbumbulo landdroshof verskyn op aanklagte van bedrog, het die polisie in KwaZulu-Natal gesê.
Volgens luit. kol. Vincent Mdunge het die drie vrouens glo na plattelandse gebiede in Mbumbulo, suid van Durban gegaan en mense se identiteitsdokumente gevra.
“Sodra hulle die gemeenskapslede se identiteitsdokumente het, registreer hulle die mense as gestremd, en neem die toelae vir hulself, sonder die gemeenskapslede se wete,” het Mdunge gesê.
Die vroue is Dinsdag gearresteer. Daar word beweer dat hulle vir die afgelope drie jaar met die slenter besig was.
“Dit is nog nie duidelik hoeveel geld hulle in die tyd geneem het nie,” het Mdunge gesê.
- Volg Nuus24 op Twitter.