Drie tronk toe ná moord op vrou in Plett

2012-09-08 08:31

Johannesburg – Drie mans is tronkstraf opgelê vir die moord op ‘n restaurantbestuurder van Plettenbergbaai, het die polisie gesê.

Kapt. Malcolm Pojie het in ‘n verklaring gesê Mzwandile Diamond is tot lewenslange tronkstraf en ‘n addisionele 29 jaar gevonnis.

Sibongile Matebese is 28 jaar tronkstraf opgelê en Mvimbe Dube is tot lewenslange tronkstraf en nóg 22 jaar gevangenisstraf gevonnis.

Hulle is in die Knysna-landdroshof gevonnis.

Die mans het Beverley Sapire, bestuurder van Lookout in Plettenbergbaai, op 21 April 2010 omstreeks 22:30 doodgeskiet. Een van die hulle het ‘n veiligheidswag ook probeer skiet.

Hulle het op die vlug geslaan sonder om enigiets te steel. Die mans is later in die Oos-Kaap aangekeer.

Diamond, Matebese en Dube is ook daaraan skuldig bevind dat hulle op 31 Maart dieselfde jaar ‘n restaurant in Keurboomstrand beroof het. Hulle het geld, juweliersware en selfone gesteel nadat hulle die bestuurder en sy werkers vasgebind het.

The Herald berig Dube het Vrydagoggend voor die vonnisoplegging in sy hand- en voetboeie uit die hof probeer ontsnap. Hy het dit tot om die hoek van die gang gemaak voordat hy terug na se selle geneem is.

Volg Nuus24 op Twitter  

- SAPA