Drie steeds in hospitaal ná veldbrand
2011-08-31 08:13
Welkom – ’n Week ná die verwoestende veldbrande in die Noord-Vrystaat waarin ’n Welkomse gesin ernstig beseer is, word die ouma, ma en seuntjie steeds in die hospitaal behandel.
Dokters was teen Dinsdag nog baie bekommerd oor die toestand van Christina Claassens (67), wat steeds in die hoësorgafdeling van die brandeenheid in die Pelonomi-hospitaal behandel word.
Sy, haar dogter, Carina (41), en kleinseun, Adriaan (6), is verlede week op die pad naby Vredefort deur hewige veldbrande oorval. Hulle het probeer wegjaag, maar die motorbande het begin smelt en hulle het toe te voet probeer vlug.
Hulle het elk sowat 40% eerste- en tweedegraadse brandwonde opgedoen, en skade aan hul lugweë weens rookinaseming.
Claassens se ander dogter, Wilma Coetzer van Bloemfontein, het Dinsdag aan Volksblad gesê dokters was die afgelope naweek baie bekommerd oor haar ma nadat sy ’n terugslag gehad het.
Dit gaan beter met haar suster en susterskind. Klein Adriaan word egter steeds in die intensiewesorgeenheid van die hospitaal behandel en Carina word in dieselfde saal as haar ma behandel.
Die familie het reeds ’n fonds gestig om die gesin op hul moeilike pad na herstel te help. Die Claassens bedryf hul eie klein onderneming vanaf hul huis in Welkom. Die onderneming staan nou stil, hulle is sonder inkomste en die familie maak hulle reg vir ’n lang en moeilike pad na herstel.
Die veldbrande in die Vrystaat het die afgelope week reeds een lewe geëis. Talle mense is beseer, duisende stuks vee doodgebrand en honderdduisende hektare weiveld vernietig.
Volg Nuus24 op Twitter.
- Volksblad