Drie skoolseuns in hof weens 'ras-moord'

2012-02-29 08:00

Jinine Botha

Johannesburg – Drie hoërskoolseuns gaan in Junie in die hooggeregshof in Johannesburg verhoor word weens die mesmoord op ’n 59-jarige man.

Na betroubaar verneem word, gaan die staat aanvoer dat die moord ’n rassevoorval was.

Dié drie (’n 16-jarige en twee 17-jariges) het Dinsdag vlugtig op aanklag van moord verskyn.

Hul saak is uitgestel omdat een van die beskuldigdes ’n nuwe regsverteenwoordiger het wat eers vir die saak moet voorberei.

Luidens die klagstaat het die seuns (een van die Hoërskool Jan Viljoen in Randfontein, een van die Hoërskool Monument in Krugersdorp en een van ’n hoërskool in die Vrystaat) die oggend van 8 Julie Ntshola Petrus Modise (59) op ’n hoewe in Dwarskloof, Randfontein, aangeval.

Modise het glo probeer vlug, maar luidens die klagstaat het die seuns hom agternagesit en later na bewering met ’n mes doodgesteek.

Die seuns het glo gevlug toe iemand hulle gesien en ’n waarskuwingskoot geskiet het.

Twee van die seuns is dieselfde dag deur lede van die gemeenskap aangekeer, terwyl die derde die aand by die Krugersdorp- private hospitaal in hegtenis geneem is.

Hy is glo vir ’n kopbesering behandel.

Tydens die drie se borgtogaansoek verlede jaar het dit aan die lig gekom dat handskoene, klapmusse en ’n geweerteleskoop in hul besit gevind is. 

Volg Nuus24 op Twitter

- Beeld