Drie skoolkinders sterf ná bus omslaan
2011-05-28 16:02
Oos-Kaap – Drie skoolkinders is dood nadat die bus waarin hulle gery het in die Oos-Kaap omgeslaan het, het die polisie Saterdag gesê.
Die kinders was op pad na 'n sportwedstryd in Tsolo.
"Hulle het vanaf Flagstaff gery om aan 'n sportwedstryd deel te neem toe hul bus tussen Lusikisiki en Port St. Johns omgeslaan het," het kapt. Mduduzi Godlwana gesê.
"'n Motoris wat agter die bus gery het, het gesê dit het gelyk asof iets fout was met die remme van die bus."
Die ongeluk het omstreeks 09:00 plaasgevind.
Drie seuns en die bestuurder van die bus is dood.
Twee leerders wat vasgekeer was onder die bus, is deur nooddienste bevry.
In totaal het 59 leerders ligte tot ernstige beserings opgedoen. Twee onderwysers is ook beseer.
Almal is na die St. Elizabeth-hospitaal geneem vir verdere behandeling.
Volg Nuus24 op Twitter
- SAPA