Drie polisiebeamptes vas vir diefstal
2010-12-11 13:38
Johannesburg – Drie polisiebeamptes is in hegtenis nadat hulle glo ‘n juwelierswinkel in Johannesburg beroof het, het die polisie Saterdag gesê.
“Daar word beweer dat die drie beamptes by die juwelierswinkel, op die hoek van Jeppe en Harrisonstraat, ingestorm en hul identifikasiekaarte getoon het. Hulle het ook gesê hulle is op 'n amptelike besoek,” het luit. Tshisikhawe Ndou gesê.
Die beamptes het die winkeleienaar gegryp, ‘n vuurwapen op hom gerig en ‘n sak met R25 000 kontant met ‘n onbekende hoeveelheid juweliersware daarin gesteel.
Die voorval het Vrydagmiddag omstreeks 13:30 gebeur.
“Toe die beamptes die winkel wou verlaat is hulle deur die sektorpolisie gevang waarna hulle deursoek en gearresteer is.”
Die verdagtes is almal tussen die ouderdomme van 40 en 41.
Die gesteelde goedere is teruggevind asook ‘n BMW met valse nommerplate.
‘n Vierde verdagte wat in die motor was, het gevlug met die BMW se sleutels, het Ndou gesê.
Die beamptes sal binnekort in die Johannesburgse landdroshof verskyn.
- Volg Nuus24 op Twitter.
- SAPA