Drie inbrekers op heterdaad betrap
2009-11-10 18:55
Johannesburg – Drie mans is in hegtenis geneem terwyl hulle by ‘n huis in Douglasdale ingebreek het, het polisie van Johannesburg gesê.
Polisie woordvoerder Balan Muthan het gesê dat die mans gereed gemaak het om goedere ter waarde van R100 000 uit die huis te neem, toe hulle deur die Douglasdale taakspan wat teen inbrekers werk gevang is.
“Niemand (anders) was gedurende die tyd in die huis nie, maar hulle word ook gesoek vir ander inbrake in die area,” het Muthan gesê.
Die mans, wat onderskeidelik 19, 24 en 25 is, sal Donderdag op aanklagtes van inbraak en diefstal in die landdroshof in Randburg verskyn.
“Ons het nog baie speurwerk om te doen om hulle met die ander sake te verbind,” het Muthan gesê.
Al drie die mans is van Eldorado Park.
- Sapa