Drie in KZN vasgetrek oor dwelms

2012-12-16 14:03

Johannesburg – Twee vermeende dwelmhandelaars en nog 'n man is in Durban in hegtenis geneem, het die polisie in KwaZulu-Natal Sondag gesê.

Die twee het na bewering die ander man gebruik om 'n lid van Durban se blitspatrollie te nader om inligting te kry oor die polisie se teendwelms-operasies.

Die beampte het die voorval vyf maande gelede aangemeld, waarna 'n ondersoek na die mans begin het. Die drie mans het na bewering betalings aan die beampte gemaak om inligting oor beplande dwelmklopjagte te ontvang.

"Verskeie betalings is aan die polisiebeamptes gemaak en gedetailleerde rekords is gehou van die transaksies. Dit was duidelik dat hulle bereid was om enigiets te doen om te verseker dat hulle baat by dwelmverkope," het kol. Jay Naicker gesê.

"Die dwelmhandelaars het meer as R59 000 in kontant tydens die operasie aan die polisie oorhandig. Die polisie het tydens 'n klopjag beslag gelê op 'n ongelisensieerde vuurwapen, R13 000 kontant en juweliersware."

Die mans sal binnekort in die hof verskyn.
    
– Volg Nuus24 op Twitter

- SAPA