Drie gewond in rooftog by winkelsentrum

2012-10-26 11:39

Kaapstad – Drie mense is in ‘n transito-rooftog by ‘n Kaapstadse winkelsentrum gewond, het ‘n koerant berig.

Cape Times berig ‘n veiligheidswag het Donderdagoggend kontant by ‘n winkel in die N1 City Mall opgelaai toe twee gewapende mans hom genader het.

‘n Konstruksiewerker sê een van die rowers het die wag in die been geskiet. Daarna het die veiligheidswag teruggeskiet.

Volgens die ooggetuie het die wag die verdagte drie keer in die bors geskiet.

Luidens die berig is ‘n verbyganger in die kruisvuur raakgeskiet.

Die ander gewapende rower het ‘n rukkie later met ‘n kontantboks by die sentrum uitgestap. Hy het begin hardloop toe hy besef dat sy medepligtige gewond is.

Die beseerde verdagte sterk tans in die hospitaal aan.

Volg Nuus24 op Twitter 

- SAPA