Drie beseer toe skare sterre van 'Bold' bestorm
2011-02-21 09:48
Johannesburg – Drie mense is lig beseer toe aanhangers van die Amerikaanse TV-sepie The Bold and the Beautiful Sondag in hul massa na die Eastgate-winkelsentrum aan die Oos-Rand opgeruk het om hul gunsteling-sterre te sien.
Die akteurs wat in Suid-Afrika is, is Jacqueline MacInnes Wood (wat Steffy Forrester in die reeks speel), Brandon Beemer (Owen Knight) en Jack Wagner (Nick Marone).
Kate Frangoudis (54) van Benoni se gewrig en een been is beseer toe sy deur ’n groep mense omgestamp is.
Sy sê dit het gebeur net toe die sepiesterre by die sentrum opgedaag en die mense mekaar gestoot en gedruk het om naby die akteurs te kan kom.
Volgens Frangoudis was daar versperrings om die skare op ’n afstand te hou.
Die versperrings het vinnig in die stof gebyt toe die skare die akteurs sien en hulle stormloop.
Tyrone van den Berg van ER24 wat by Eastgate aan diens was, het gesê hy het nog twee mense met ligte beserings behandel: ’n agtjarige meisie met ’n kopbesering en ’n 14-jarige meisie met ’n kniebesering.
Volgens Van den Berg het die sentrum se bestuur die nooddienste nie van die internasionele sepiesterre se besoek in kennis gestel nie.
“As ek dit vooraf geweet het, sou ek gereël het dat daar meer paramedici saam met my aan diens was.”
Tshepo Monnamoroe, een van die Eastgate-bestuurders wat gister aan diens was, het gesê ’n verklaring oor die sepiesterre se besoek sal vandag uitgereik word.
Eastgate se veiligheidsafdeling was in beheer van die veiligheidsreëlings vir die geleentheid.
Volg Nuus24 op Twitter
- Beeld