Drie beseer ná walvis op boot beland

2012-11-06 10:28

Kaapstad – Drie mans is beseer nadat 'n walvis naby Port Elizabeth op hul boot beland het, het die Nasionale Seereddingsinstituut (NSRI) gesê.

Craig Lambinon, woordvoerder, het gesê die voorval het Maandagaand naby Noordhoek plaasgevind.

Albertus Myburgh (41), Wouter van Heerden (25) en Rodney van der Mecht (35) het teruggeswem na die boot nadat dit onder die gewig van die walvis omgeslaan het.

Lambinon het gesê een van die mans se selfone het nog gewerk en hulle het toe die boot se eienaar gebel vir hulp.

Myburgh het gebreekte ribbes opgedoen en sy been en arm beseer. Hy is in 'n ernstige, maar stabiele toestand in die hospitaal.

Van Heerden se arm is beseer en Van der Mecht het ligte beserings opgedoen.

Lambinon het gesê die boot is na die Noordhoek-skiboot-klub gesleep.

"Die mans weet nie watter tipe walvis dit was nie, maar hulle sê dit was groot."

Bultrug-walvisse is onlangs in die gebied opgemerk.

– Volg Nuus24 op Twitter

- SAPA