Drie agter tralies vir moord op druiweboer

2012-09-20 18:27

Kaapstad – Drie mans is tot lewenslange tronkstraf gevonnis vir die moord op ‘n druiweboer van Stellenbosch, het die Nasionale Vervolgingsgesag gesê.

Eric Ntabazalila, ‘n woordvoerder vir die NVG, sê Mfundiso Yese, Simamkele Mralaza en Cedrick Vusumzi Mphakathi is in die Kaapstadse hooggeregshof gevonnis.

Hulle is verlede week daaraan skuldig bevind dat hulle Alberto Costa op 18 November 2011 op sy stoep doodgeskiet het.

Regter André le Grange het vroeër bevind die skuldiges het vooraf bymekaar gekom om die rooftog te beplan.

Vizicelo Madolo, die vierde man wat van die moord op die boer skuldig bevind is, het in Junie ‘n pleitooreenkoms met die staat aangegaan. Hy is tot 20 jaar tronkstraf gevonnis.

Die oorledene se vrou, Zelda, het vroeër aan Cape Times gesê sy is nou ‘n enkelma van twee kinders en moet ook haar man se vier plase bestuur.

“... Dit maak nie saak wat met hulle [die moordenaars] gebeur nie; niks sal hom terug bring nie.”

Volg Nuus24 op Twitter    

- SAPA