Turkse sendelinge betas, slaan glo seuns
2010-10-21 08:30
Beeld
Polokwane (Pietersburg). – Drie Turkse sendelinge wat opleiding in die Islam-geloof by ’n nasorgsentrum hier gee, het minderjarige seuns glo aangerand en na bewering betas.
Die drie jong mans het Woensdagmiddag laat in die landdroshof in die stad verskyn op aanklagte van aanranding, aanranding met die opset om ernstig te beseer en die oortreding van die Wet op Seksuele Misdrywe.
Die 22-, 24- en 19-jarige mans is Maandag ná ’n polisie-ondersoek in hegtenis geneem. Ingevolge wet mag hulle nie geïdentifiseer word nie omdat hulle nog nie op die seksuele aanklagte teen hulle gepleit het nie. 12 seuns van tussen 11 en 14 jaar oud wat by die nasorgsentrum woon, is die klaers in die saak.
Die seuns kom almal uit agtergeblewe gemeenskappe in Limpopo en almal kom uit arm huise.
Hulle beweer hulle is glo geslaan en die mans het glo ook honde op hulle losgelaat. Die seuns beweer ook die mans het hulle gesoen en betas.
Mnr. Andries Rheeder, die mans se regsverteenwoordiger, het tydens hul borgtogaansoek gesê al die leerlinge is intussen by die nasorgsentrum verwyder. Hulle is tans in ’n plek van veiligheid. Die seuns is ook vroeër die week na ’n hospitaal geneem vir mediese ondersoeke.
Die mans is die afgelope twee jaar verbonde aan die nasorgsentrum. Hulle woon ook daar en vervoer die kinders glo daagliks na en van die laerskool. Hulle gee ook klasse oor die Islam-geloof ná skool aan die kinders.
Die mans kan glad nie Engels praat of verstaan nie.
Die hofverrigtinge moes in Turks vir hulle getolk word.
Me. Alice Lekganyane, staatsaanklaer, het nie borgtog teengestaan nie. Die mans se paspoorte is ingedien.
Landdros Janine Ungerer het die saak tot 2 Desember vir verdere ondersoek uitgestel.
mlouw1@beeld.com