Drankverkope se doppie geklink
2010-06-02 09:00
Marelize Barnard
Kaapstad - Nog strenger maatreëls om die handelsure vir drankverkope te beperk gaan hier ingestel word.
Streng nuwe stappe met ’n boete van tot R30 000 of drie jaar gevangenisstraf is van die aanbevelings van ’n spesiale taakspan van die Kaapse stadsraad wat in die nuwe verordening oor drankverkope vervat is.
Daar word beoog dat dié nuwe regulasies oor drankverkope reeds op 1 September in werking sal tree. Die finale konsep van die nuwe verordening moet nog net deur die burgemeesterskomitee en stadsraad goedgekeur word.
Dié stappe gee die stadsraad hier groter mag om die ure van drankverkope vir gebruik op persele (restaurante, nagklubs, kuierplekke en wynplase) asook verkope van drank vir verbruik op ander plekke (drankwinkels en supermarkte) te beheer.
Thaki Amira, voorsitter van die stadsraad se taakspan wat die nuwe drankverordening ondersoek het, het Dinsdag gesê die stadsraad het eers vasgestel wat hy ingevolge drankwetgewing mag reguleer, waarna die nuwe verkoopsure bepaal is.
’n Groot deel van die dokument oor die nuwe verordening sluit honderde kwelvrae en voorstelle van die publiek, drankbedryf, kettingwinkels en kuierplekke in. Dié kommentaar is verkry deur ’n omvattende proses van openbare deelname.
Uiteindelik is die doppie geklink vir ongereguleerde drankverkope wat nie die regte in ag neem van bure, ander besighede en inwoners binne die groter grense van die Kaapse metropool nie. Die ure van drankverkope is ingevolge die sonerings binne die stadsgrense bepaal en verskil vir uitsluitlik residensiële gebiede, sakegebiede en landbougebiede.
Amira stel voor gegriefdes begin sommer nou al aantekeninge maak indien drankverbruik- en verkope op nabygeleë persele ’n openbare las veroorsaak.
“Gaan dien ’n klag by die polisie in en hou ’n bewys daarvan. Sodra die verordening deurgevoer is, kan opgetree word.”
Drankverkoopspunte gaan voortaan nie meer outomaties hul dranklisensies hernieu nie. Dié lisensies gaan jaarliks deur die Dranktribunaal hersien word.
- Die Burger