Dosent oor die rug gemoker oor ‘moeilike vraestel’
2011-11-05 08:21
Johannesburg – ’n Tweedejaarstudent in ingenieurswese aan die Universiteit van die Witwatersrand het sy dosent eergister in ’n eksamenlokaal met ’n stok oor die rug gemoker oor sy vraestel glo te moeilik was.
Volgens ooggetuies het die student, net bekend as Mfundo, uitgeglip ’n paar minute nadat die vraestelle om 14:00 uitgedeel is en ’n stok buite opgetel.
“Ek was so geskok, want die hele voorval het reg voor my oë gebeur,” het ’n regstudent gister op voorwaarde van anonimiteit gesê.
“Ons het saam met die tweedejaar-ingenieurs in dieselfde lokaal geskryf. Hulle het bouwetenskap geskryf. Dit was in ons vyf minute- leestyd toe Mfundo sy dosent, Obinna Ozumba, met ’n stok hard op die rug geslaan het.”
Die studente kry vyf minute leestyd om die vraestelle deur te lees en seker te maak alles is in orde voordat hulle begin skryf.
“Ozumba het omgedraai, die stok in twee gebreek, hom gevra waarmee hy dink hy besig is en veiligheidsbeamptes ontbied. Albei het baie kwaad gelyk. Mfundo het ewe verwaand op sy selfoon gestaan en speel sonder om ’n woord te sê totdat hy weggelei is,” het die regstudent gesê.
Volgens Mfundo se klasmaats het Ozumba en Mfundo vantevore oor punte vasgesit.
“Mfundo is ’n baie stil ou. Ons is almal nogal geskok oor wat gebeur het,” het ’n klasmaat gesê.
Sommige het gesê dit was ’n baie moeilike vraestel.
Shirona Patel, Wits se kommunikasiehoof, het bevestig Ozumba is aangerand, maar wou nie Mfundo se naam of van bevestig nie. Patel kon ook nie sê of hy met sy eksamen mag aangaan of hangende die ondersoek geskors is nie. “Die universiteit is bewus van die voorval en ondersoek die saak,” het sy gesê.
– Volg Nuus24 op Twitter
- Die Burger