Dosent gebruik glo kru taal oor Zuma
2011-11-15 09:04
Kaapstad – Die gedrag van ’n dosent van die Militêre Akademie op Saldanha word op hoë vlak deur die Suid-Afrikaanse Nasionale Weermag ondersoek nadat hy na bewering kwetsende aanmerkings en kru taal in ’n kroeg gebruik het om pres. Jacob Zuma te beledig.
Hoewel die Militêre Akademie nie ’n woord oor die voorval wou rep nie, is Die Burger in besit van e-pos van Ivor Lee van Saldanha wat aan ene maj.genl. Lindiwe Yam, bevelvoerder van die Akademie, gerig is. In die e-pos versoek Lee dat die voorval amptelik ondersoek moet word.
’n Afskrif is ook gestuur aan Marius Fransman, adjunkminister van internasionale betrekkinge en samewerking. Fransman is ook die leier van die ANC in die Wes-Kaap.
Die dosent – wie se naam aan Die Burger bekend is – het na bewering vir Zuma as ’n “ruggraatlose p—sie” uitgekryt en wou glo van Lee weet hoekom Zuma toelaat dat “korrupsie net voortgaan”.
Lee sê in sy e-pos: “Ek het hom versoek om my en my vriende alleen te laat. Ek het ook by die eienaar gekla. Hy is gevra om ons uit te los.
“Hy het egter voortgegaan om ons te teister en politiek gedrewe vrae oor pres. Zuma en die ANC te vra. Ek vind dit vreemd dat ’n persoon wat in diens is van die staat so beledigend en disrespekvol teenoor die president van die land kan wees.”
By navraag wou Lee nie kommentaar lewer nie. “Ek het niks verder om te sê nie.”
Siphiwe Dlamini, kommunikasiehoof van die weermag, het gesê albei partye het verklarings oor die voorval afgelê.
“Volgens ons inligting is een van die partye ’n dosent by die Militêre Akademie. Ons wil klarigheid oor die beweerde voorval hê en daarom is die uitslag nog nie gefinaliseer nie. Dit is na die bevelvoerder en die hoof van menslike hulpbronne verwys.”
Mac Maharaj, presidensiële woordvoerder, het gesê dit is die eerste keer dat die presidensie hiervan hoor. Dit moet die normale roete van ondersoek loop.
– Volg Nuus24 op Twitter
- Die Burger