Dorp gis oor beendere-vonds
2011-04-12 09:42
Kuruman - Die polisie op die dorp stel ondersoek in nadat vermoedelik renosterbeendere in die veld langs die Reivilo-pad sowat 11km buite die dorp gevind is.
Dit kom nadat kameelperd- en elandbeendere verlede jaar agter die dorp se nywerheidsgebied gevind is.
Inwoners van die dorp gis oor die oorsprong van die jongste vonds en daar is beweringe dat dit moontlik van renosters afkomstig is.
Ao. Paul Schoeman van die Kuruman-polisie het die bene ontdek terwyl hy op ’n lugpatrollie langs plaaspaaie gevlieg het. Hy het monsters na Onderstepoort gestuur om te bepaal van watter soort dier of diere dit kom.
Die uitslag van die toetse sal aan die einde van die week bekend wees, sê hy.
Dr. David Mabunda, uitvoerende hoof van SANParke, het vroeër vanjaar in ’n verklaring gesê dat SANParke geld van wildveilings gaan gebruik om die DNS van elke renoster in Suid-Afrika op ’n databasis te kry.
SANParke, die Nasionale Vervolgingsgesag en die direktoraat vir voorkeurondersoeke het saam met die departement van genetika by Onderstepoort toerusting ontwerp waarmee DNS-monsters van elke renoster in die land geneem kan word.
Mabunda het op die bekendstelling van die DNS-toerusting gesê Suid-Afrika het nou ’n nuwe wapen teen renosterstropers gekry.
Verskeie inwoners van Kuruman meen dat dit renosterskarkasse is wat langs die pad lê.
Met Volksblad se besoek aan die toneel was daar geen skedels of horings nie, maar wel onder meer heupbene en ribbene.
Die bene lê in ’n donga reg langs die grondpad en 1 km van die hoofpad tussen Daniëlskuil en Kuruman. Die beendere is sowat drie weke gelede hier gestort en het nog sleg geruik.
Dit kom nadat kameelperd- en elandbene asook saaglemme verlede jaar in Oktober agter die nywerheidsgebied op Kuruman gestort is.
Ao. Schoeman het toe ook ’n navraag geopen om te bepaal wie die bene weggegooi het en wat die rede is.
Die ondersoek duur voort.
- Volksblad