Doofstom meisie vermis
2010-03-12 11:47
Durban – Polisie in KwaZulu-Natal was Vrydag op soek na ‘n sewejarige doofstom meisie in Umhlali naby Stanger wat vermoedelik dood kan wees.
“Die meisie het twee dae gelede vermis geraak. Polisie het Woensdag vir die meisie begin soek. Daar is vermoedens dat die dogtertjie moontlik vermoor is,” het supt. Vincent Mdunge gesê, sonder om verder uit te brei.
Volgens Mdunge het die meisie en haar ma op ‘n suikerrietplaas gewoon waar die ma gewerk het.
Die meisie se ma het nie die polisie gekontak ná die kind se verdwyning nie, maar eerder na ‘n tradisionele geneesheer gegaan om die kind te probeer opspoor.
“Die plaas is in ‘n afgeleë area in die suikerrietvelde. Ons sal vandag [Vrydag] voortgaan om vir die meisie te soek,” het Mdunge gesê.
- Sapa