Doodstraf nie 'n opsie – minister
2013-02-12 14:01
Bredasdorp – Die twee mans wat van die moord op Anene Booysen teregstaan moenie borgtog toegestaan word nie, het Lulu Xingwana, minister van vroue, kinders en mense met gestremdhede, Dinsdag gesê.
"Ons sê vandag aan die howe daar moet geen borgtog wees nie," het sy ná die verskyning van Jonathan Davids en Johannes Kana aan joernaliste gesê.
Xingwana het gesê swaarder vonnisse kan 'n afskrikmiddel wees vir misdadigers wat vroue en kinders mishandel en vermoor.
Anene is om die beurt verkrag en vermink nadat sy by 'n kuierplek was. Sy is by die Asla-bouterrein, waar sy gewerk het, gevind, maar het later in die hospitaal gesterf.
Xingwana het die hofverskyning bygewoon en Anene se familielede getroos.
Die saak is tot 26 Februarie uitgestel, wanneer die beskuldigdes om borgtog sal aansoek doen.
Op die vraag of die regering weer die doodstraf vir dié soort misdade gaan instel, het Xingwana gesê dit is teen die demokratiese waardes van die land.
"Dit is teen ons etos van menseregte."
Sy het verder gesê die land sal ook nie oorweeg om verkragters te kastreer, soos in ander lande gedoen word nie.
"As 'n regering sal ons niks doen wat onwettig is nie. Ons glo in menseregte vir almal en glo die howe is die liggaam wat die gesag moet hê om te verseker dat die reg sy gang gaan."
– Volg Nuus24 op Twitter
- SAPA
