Doodstaxi-bestuurder verskyn in hof
2010-09-01 07:16
Kaapstad – Die landdros in die taxi-ongeluksaak waarin tien leerders gesterf het, het gister aan die hof gesê hy ken die pyn van ’n ouer wat ’n kind aan die dood moes afstaan.
Jacob Humphreys (55), die bestuurder van die doodstaxi waarin nege leerders verlede Woendag gesterf het, het in die Blue Downs-landdroshof voor landdros Gerald Hattingh verskyn. ’n Tiende kind is Vrydag in die hospitaal dood.
Humphreys staan tereg op 10 aanklagte van strafbare manslag.
Hattingh het gesê hy ervaar steeds ná 24 jaar die pyn van sy kind se dood. Sy kind was 13 jaar oud. Hy het sy simpatie met die ouers, naasbestaandes en familie van die kinders betoon, maar ook gesê hy is simpatiek teenoor die situasie waarin Humphreys hom bevind.
Humphreys, wat by die Mfuleni-polisiekantoor aangehou is, het met sy hofverskyning glimlaggend vir familielede en ondersteuners in hof 1 van die Blue Downs-landdroshof gewaai.
Van sy familielede het met lyfwagte by die hof aangekom.
Daar was ’n paar steke in Humphreys se kop sigbaar.
Hy het na bewering oor ’n treinoorgang in Buttskopstraat, Blackheath, gery en ’n aankomende trein het in die taxi vasgery.
Adv. Quintin Appels, ’n staatsaanklaer van die direkteur van openbare vervolging se kantoor, het gesê die aanklagte kan verander namate die ondersoek vorder.
Hy het die landdros om uitstel gevra en gesê die staat is nog nie gereed vir ’n formele borgtogaansoek nie. Volgens hom het hulle nog inligting nodig.
Twee van die gesinne wie se kinders in die ongeluk gesterf het, het ’n advokaat aangestel om hul kinders se regte in die saak te beskerm. Adv. Yvette Isaacs het gesê sy verteenwoordig die ouers van Reece Smith (7) en Jason Pedro (14). Sy sal die hofsaak bywoon en al die prosesse rondom die hofverrigtinge aan hul ouers verduidelik.
Humphreys se regsverteenwoordiger, adv. William Fischer, het gesê sy kliënt sterk goed aan.
Hy is ’n asmalyer en daar is gevra of sy medikasie vir hom gegee word.
Die saak is tot 7 September uitgestel en Humphreys word tot dan in die Pollsmoor-gevangenis aangehou.
* Reece Smith (7) en Jason Pedro (14) word vandag begrawe. Reece word om 09:30 uit die Lighthouse Kerk in Kuilsrivier begrawe en Jason om 10:00 uit die Baptistekerk in Gabrielstraat, Forest Glade. Besigtiging is om 09:00 by Jason se ouerhuis.
Volg Nuus24 op Twitter.