Dood van 22 babas in Kby bekyk
2010-07-27 09:19
Kimberley. – Die redes vir die dood van 22 pasgebore babas in Junie in die Kimberley-hospitaal moet oopgevlek word, het Pakes Dikgetsi, Cope-lid in die Noord-Kaapse wetgewer en lid van dié wetgewer se portefeuljekomitee vir gesondheid, gister gesê.
Niks moet onder die mat ingevee word nie.
Hy het gesê dié komitee vergader vandag om op dié sterftes te fokus. Dit is vermoedelik meer as gewoonlik. Volgens die departement is die getal sterftes onder meer weens ’n groot getal tienerswangerskappe en ma’s wat nooit enige gesondheidsgerief besoek het nie.
Die topbestuur van die Noord-Kaapse departement en sy hoof moet hieroor kom verslag doen. Hopelik sal Mxolisi Sokatsha, Noord-Kaapse LUR vir gesondheid, ook teenwoordig wees, het Dikgetsi gesê.
Hy het gesê die komiteelede wil statistieke sien sodat dié sterftes met ander maande vergelyk kan word. Hy het gesê ’n mens wil nie oor die redes vir die dood van dié babas spekuleer nie en of dit weens natuurlike oorsake of nalatigheid is nie, maar die dood van een pasgebore baba is te veel.
Die dood van 22 sulke babas in een maand is baie ernstig. Dit is vir enige ma baie traumaties om ’n baba te verloor, het Dikgetsi gesê.
Na verneem word, is dié sterftes veral toe te skryf aan die groot getal pasiënte wat na die Kimberley-hospitaal oorgeplaas word en die swak ambulansdienste waarmee hulle vervoer word. Teen die tyd dat die verwagtende vroue by dié hospitaal aankom, is dit te laat om die baba te red. Van die sterftes kan glo regstreeks met nalatigheid en infeksies verbind word.
Lulu Ntsie, woordvoerder van die Noord-Kaapse departement van gesondheid, het gesê die statistieke en kliniese diagnose word elke maand met dokters en spesialiste by die hospitaal bespreek.
“Die statistieke vir Junie het 107 toelatings gewys en 22 is dood. Altesaam 50% van die toelatings het tienerswangerskappe ingesluit, asook ma’s wat nooit enige gesondheidsgerief besoek het nie. Dit het die getal geboortes van premature babas en geboortekomplikasies verhoog.”
Ntsie het gesê die rede vir die hoë getal sterftes vir Junie sluit in gevalle van vroue wat nie voorgeboorte-klinieke besoek het nie, vroue wat laat by klinieke en hospitale aangekom het, babas wat baie ondergewig was met geboorte en babas met ’n aangebore misvormdheid, asook babas van ma’s wat MIV-positief is en wat nie voorgeboorte-sorg bygewoon het vir behandeling om te voorkom dat dit van die ma na die kind oorgedra word nie.
Volksblad wou gister by Ntsie weet hoeveel pasgebore babas in onderskeidelik April en Mei in dié hospitaal dood is en wat die hoofredes vir hul sterftes is, asook hoeveel van die 22 babas te vroeg gebore is en wat hulle geweeg het.
Volksblad het ook die name gevra van die ouers van die pasgebore babas wat in Junie dood is. Ntsie het gesê sy kan eers vandag hierop reageer.
- Volksblad