Dood by polisiestasie ondersoek
2010-01-06 14:21
Johannesburg - Die polisie probeer vasstel hoe dit gebeur het dat ‘n 42-jarige ooggetuie van ‘n misdaad by die polisiestasie in Eldorado Park gesterf het.
Supt. Lungelo Dlamini het gesê die bevelvoerder van die polisiestasie in Eldorado Park is tans besig om die dood van Liviron Sampson, wat na bewering ondervra is omdat sy die ooggetuie van ‘n diefstal was, te ondersoek.
“Die stasiebevelvoerder ondersoek tans al die bewerings. Hy sal verklarings van almal wat by dié voorval betrokke was neem. Daar is ook ‘n interne ondersoek wat aan die gang is,” het Dlamini gesê.
Sampson se familie het die polisie blykbaar gewaarsku dat sy probleme met haar skildklier het.
Sy het nie goed gevoel nie en haar suster, Mo van Zyl, het gevra dat sy toegelaat word om na die hospitaal geneem word.
“Maar die polisie het nee gesê omdat sy in polisie-aanhouding was,” het Van Zyl gesê.
Sampson het kort daarna in die badkamer by die polisiestasie inmekaargesak.
“Die ambulans het ongeveer drie ure later opgedaag…toe het hulle vir ons gesê dat sy dood is,” het Van Zyl gesê.
Sy het gesê die polisie het aan die familie gesê dat Sampson weens ‘n hartaanval gesterf het.
- Sapa